美國樂壇天后Britney Spears喺08年壓力爆煲，被法院任命爸爸Jamie Spears擔任佢監護人，自此佢嘅財政、工作同生活安排都由爸爸控制一切。Britney一直想擺脫監護令，多次向法院申請撤銷父親監護權，今日終於傳出好消息，佢爸爸自願撤銷監護人身份。
Britney早前喺聽證會大爆其父惡行，包括沒收信用卡、現金同護照，連一部iPad都唔以買，超過3億港元資產被爸爸掌控，強迫佢一星期七日工作，唔可以未經批准睇醫生，安排公關公司管理佢嘅IG page，更喺Britney身上安裝避孕裝置，以免佢同男友生兒育女。一切虐待令Britney終日以淚洗面同失眠，一眾粉絲發起 #FreeBritney 運動力撐偶像。
今日有傳媒流出法律文件，Jamie Spears喺當中表示雖然要撤銷佢監護權係毫無根據，但佢願意喺適當時間辭任監護人。佢指縱然受到無理攻擊，就監護權同個女開戰，對Britney唔係好事。而Britney嘅代表律師就發聲明，指Jamie Spears嘅決定對Britney嚟講係完全正確。
Search